“Məktəblərin mühafizəsi dövlət tərəfindən qorunacaq”.
“Report” xəbər verir ki, bunu Təhsil nazirinin müavini İdris İsayev media üçün təlimdə yeni qəbul olunan “Ümumi təhsil haqqında” qanunla bağlı çıxışında qeyd edib.
O qeyd edib ki, qanunvericiliyə edilmiş son dəyişikliyə əsasən, təhsilalanların, pedaqoji və texniki heyətin təhlükəsizliyini təmin etmək məqsədilə ümumi təhsil müəssisəsində müvafıq icra hakimiyyəti orqanının müəyyən etdiyi qaydada mühafizə xidməti təşkil ediləcək.
Təhsil Nazirliyinin Aparat rəhbərinin müavini Fərzəli Qədirov isə əlavə edib ki, hazırda məktəbəhazırlıq ümumi təhsilin səviyyəsi kimi qanunda göstərilib: “Fərdin ümumtəhsil müəssisələrində olma müddəti 12 il təşkil edəcək. Təhsil müəssisələrinin mühafizəsi hamını düşündürür. Yeni qanunda birbaşa göstərilib ki, məktəblərin mühafizə xidmətinin təşkili ilə bağlı qaydalar 6 ay müddətində tərtib olunub təqdim olunacaq”.
